រាជធានីភ្នំពេញ ៖ ពលរដ្ឋក្នុងសង្កាត់ផ្សារថ្មីទី០១ លើកឡើងថា ទីតាំងល្បែងស៊ីសង Joker និងល្បែងផ្សេងទៀត ក្នុងសង្កាត់ផ្សារថ្មីទី០១ តាមបណ្តោយផ្លូវ៥១ឬវិថីប៉ាស្ទ័រ កំពុងបើកដំណើរការលេង ភ្លូកទឹក ភ្លូកដី ចាក់ភ្នាល់រាប់រយដុល្លារ និងសង្ស័យជាកន្លែងប្រើប្រាស់គ្រឿងញៀន មានទាំងក្មេង មានទាំងចាស់ បែរជាសមត្ថកិច្ចខណ្ឌដូនពេញទាំងមូល រក្សាភាពស្ងាត់ស្ងៀមយ៉ាងត្រជាក់ចិត្ត។

បើយោងតាមប្រជាពលរដ្ឋ នៅតំបន់នោះបានអោយដឹងថា តើសង្ឃឹមលើលោកមេប៉ុស្ត៍ ចៅសង្កាត់ផ្សារថ្មី០១ លោកជា ខេមា អភិបាលខណ្ឌដូនពេញ និងលោក ទៀង ចន្ទសា អធិការខណ្ឌដូនពេញស្អីទៀត បើវង់ល្បែងគគ្រឹកគគ្រេងពេញមូលដ្ឋានអស់លោកមិនអើពើបង្ក្រាបផង មានតែស្នើរសុំ ឯកឧត្តម ឃួង ស្រេងអភិបាលរាជធានីភ្នំពេញ និងលោកជួន ណារិនអគ្គស្នងការរងនគរបាល និងជាស្នងការនគរបាលរាជធានីភ្នំពេញទេ ទើបអាចបង្ក្រាបបានមើលទៅ។

ពលរដ្ឋលើកឡើងទៀតថា ម្ចាស់ទីតាំងល្បែងខាងលើ នេះ បានរៀបចំសេនារិយោល្អិតល្អន់ណាស់ ដោយមាន ចាំមើលផ្លូវចូល ដើម្បីឃាត់មនុស្សសួរនាំ បើជាអ្នកទៅលេងល្បែងពិតប្រាកដ ទើបអោយចូល តែបើជាអ្នកកាសែតគេអោយលុយតិចតួចត្រឡប់ក្រោយវិញ តែបើមិនស្តាប់នោះនិងមានហឹង្សាជាក់ជាមិនខាន។

ទោះយ៉ាងណាក៏ដោយ ពលរដ្ឋនៅតែទទូចស្នើរសុំអាជ្ញាធររាជធានីភ្នំពេញ សុំមានវិធានការបង្ក្រាបទប់ស្កាត់ តាមផ្លូវច្បាប់ចំពោះទីតាំងល្បែងសុីសងខាងលើនេះផង៕